21. September 2026

70 manns mættu á heilsukvöld með Helgu Möggu

Um 70 manns mættu á vel heppnað námskeið með Helgu Möggu í Hagkaup á Smáratorgi í tengslum við Heilsudaga Hagkaups. Mikil ánægja var með kvöldið þar sem góð næring, einfaldar lausnir og heilsan í víðu samhengi voru í aðalhlutverki.

Kristín Þóra, andlit Heilsudaga Hagkaups í ár, opnaði kvöldið með einlægu spjalli um heilsuna og mikilvægi þess að hlúa að sér. Það rímar vel við yfirskrift Heilsudaganna í ár, „Veldu heilsuna“, þar sem áherslan er á að heilsa snúist um miklu meira en mataræði og hreyfingu. Hún snýst líka um andlega líðan, svefn, samveru, gleði og að finna það sem hentar hverjum og einum.

Í kjölfarið tók Helga Magga við og töfraði fram fjölbreytta rétti sem eiga það sameiginlegt að vera einfaldir, næringarríkir og þægilegir fyrir annasamt hversdagslíf. Hún deildi jafnframt snjöllum ráðum og hugmyndum að því hvernig hægt er að gera góða næringu að einföldum hluta dagsins.

„Við viljum með Heilsudögunum minna á að heilsa þarf hvorki að vera flókin né snúast um fullkomnun. Kvöld eins og þetta sýna vel hvað við viljum gera, skapa vettvang þar sem fólk getur komið saman, fengið innblástur og fræðslu og tekið með sér einfaldar hugmyndir sem nýtast í daglegu lífi,“ segir Eva Laufey Kjaran, markaðs- og upplifunarstjóri Hagkaups.

Heilsudagar Hagkaups standa nú yfir og auk viðburða og fræðslu er boðið upp á fjölbreytt úrval tilboða á vörum sem tengjast heilsu og vellíðan.