Viðskipta- og persónuverndarskilmálar
Viðskiptaskilmálar fyrir Vefverslun Hagkaups
1. Um viðskiptaskilmálana
1.1. Þetta skjal inniheldur þá viðskiptaskilmála (hér nefndir viðskiptaskilmálarnir) sem gilda þegar viðskiptavinur okkar (hér nefndur viðskiptavinur eða þú) kaupir vörur í Vefverslun Hagkaups (hér nefnd verslunin) en hún er verslun sem er rekin á Vefnum. Nálgast má verslunina á vefsetri sem er aðgengilegt á vefslóðinni www.hagkaup.is og netfang verslunarinnar er vefverslun@hagkaup.is. Verslunin er rekin af okkur, Hagkaupi, kt. 430698-3549 (hér nefnt seljandi eða við), Skútuvogi 5, 104 Reykjavík, s. 563-5000. Hagkaup er smásölufyrirtæki í eigu félagsins Hagar verslanir ehf., kt. 470710-0390.
1.2. Fjallað er í sérstöku skjali (hér nefndir persónuverndarskilmálarnir) um hvaða persónuupplýsingar við vinnum með í versluninni, tilgang vinnslunnar og heimildir fyrir henni, miðlun persónuupplýsinga og geymslutíma þeirra, auk ýmissa annarra atriða um þá vinnslu persónuupplýsinga sem fram fer í tengslum við verslunina.
1.3. Til þess að geta keypt vörur í versluninni þarft þú áður að staðfesta að hafa kynnt þér vandlega og samþykkt bæði viðskiptaskilmálana og persónuverndarskilmálana. Vakin er sérstök athygli á því að þó að gögn um viðskipti viðskiptavina í versluninni séu geymd í upplýsingakerfum á Evrópska efnahagssvæðinu (EES) þá eru sumir þeirra þjónustuaðila sem fá aðgang að þeim kerfum staðsettir fyrir utan EES og því þarf hver viðskiptavinur fyrir sig að samþykkja ótvírætt og sérstaklega þá lýsingu á vinnslu persónuupplýsinga sem kemur fram í persónuverndarskilmálunum ef þeir vilja eiga viðskipti við verslunina.
1.4. Aðgangur að versluninni er eingöngu heimill einstaklingum sem eru 18 ára eða eldri og eru fjárráða.
1.5. Notkun verslunarinnar er með öllu óheimil nema í samræmi við ákvæði viðskiptaskilmálanna.
1.6. Allar tilraunir til að brjóta („hakka“) eðlilega virkni vefverslunarinnar, til dæmis til að komast fram hjá aðgangshindrunum, fara fram fyrir röð í bið eftir vinsælli vöru, skerða aðgengi að versluninni, breyta verðum eða vöruframboði í henni eða safna upplýsingum um fjölda af vörum í einu („skrapa“), eru með öllu óheimilar.
1.7. Þér er skylt að varðveita aðgangs-/lykilorð að aðgangi þínum að versluninni þannig að óviðkomandi aðili geti ekki komist yfir það. Öll notkun aðgangs þíns að versluninni skal vera alfarið á þína ábyrgð. Ef þig grunar að óviðkomandi hafi komist yfir aðgangs-/lykilorð að aðgangi þínum að versluninni ber þér að tilkynna það án tafar á netfang verslunarinnar, sbr. 1.1 hér að framan.
1.8. Þú berð ábyrgð á að uppfæra skráningu í vefversluninni hverju sinni á netfangi þínu og heimilisfangi svo við getum átt í samskiptum um kaup þín og, þegar um heimsendingu er að ræða, sent þér vörur á rétt heimilisfang.
1.9. Þessi útgáfa viðskiptaskilmálanna gildir um kaup í versluninni sem eiga sér stað eftir 1. mars 2023.
1.10. Viðskiptaskilmálarnir eru ávallt aðgengilegar á vefsíðu okkar. Við áskiljum okkur rétt til að breyta þeim án fyrirvara. Í skilmálunum kemur ávallt fram hvenær núgildandi útgáfa tók gildi til þess að þú getir séð hvort þeir hafi breyst frá því að þú samþykktir þá síðast þegar þú notaðir verslunina.
2. Viðskipti við verslunina
2.1. Við birtum í versluninni eins greinargóðar lýsingar og okkur er unnt á þeim vörum sem eru þar til sölu og eiginleika þeirra. Við birtum einnig eftir því sem tilefni gefst lýsandi ljósmyndir af vörunum.
2.2. Ef þú kaupir vöru í verslun okkar og staðfestir kaupin með því að gefa upp gildan greiðslumiðil sem við tökum við á hverjum tíma, svo sem Netgíró eða greiðslukort sem skuldfærsla tekst á fyrir söluverði og eftir atvikum sendingarkostnaði, þá kemst þar með á samningur milli þín og okkar um kaup á þeirri vöru sem svarar til þess vörunúmers sem þú valdir í versluninni. Skuldfært söluverð inniheldur virðisaukaskatt og allan annan aukakostnað okkar af að bjóða þér vöruna til kaups en að auki er skuldfært fyrir sendingarkostnaði, þar sem hann á við (sjá hér að neðan).
2.3. Um ábyrgð á seldum vörum og viðskipti okkar að öðru leyti gilda lög um neytendakaup, nú nr. 48/2003 og lög um neytendasamninga, nú nr. 16/2016, að teknu tilliti til skilmála þessara.
2.4. Okkur er ekki skylt að afhenda eða senda þér vöru fyrr en greiðsla hefur borist, t.d. að skuldfærsla fyrir kaupunum hefur tekist á uppgefið greiðslukort þitt.
2.5. Okkur er heimilt að falla frá kaupum ef mistök hafa orðið í skráningu vöru, svo sem ef rangt verð birtist í versluninni eða boðin er þar til sölu vara sem ekki er lengur til hjá okkur.
2.6. Við berum ekki ábyrgð á að vara sem þú kaupir í versluninni: henti í einhverjum ákveðnum tilgangi, til dæmis sem þú ætlaðir að nota vöruna í; hafi einhverja tiltekna eiginleika til að bera, svo sem varðandi endingu, sem ekki koma sérstaklega fram í lýsingu á vörunni í versluninni; eða verði afhent í einhverjum sérstökum umbúðum sem ætlaðar eru til að varðveita eða vernda vöruna.
2.7. Þú getur komið og sótt í verslunina okkar í verslunarmiðstöðinni Smáralind í Kópavogi, þér að kostnaðarlausu, þær vörur sem þú hefur keypt í versluninni eða fengið þær sendar heim á höfuðborgarsvæðinu eða, ef um er að ræða aðrar vörur en matvörur, á landsbyggðinni. Veislurétti þarf að sækja innan þess dags sem valinn er í kaupferli en ef það er ekki gert er maturinn ekki endurgreiddur. Ef þú sækir ekki innan 14 daga aðrar þær vörur sem þú tilkynntir okkur að þú myndir sækja þá lítum við svo á að þú hafir fallið frá kaupunum og munum bakfæra þau.
2.8. Ef þú óskar eftir að við sendum þér vörur sem þú kaupir hjá okkur þá kaupum við ekki tryggingar vegna flutnings þeirra til þín. Við berum því enga ábyrgð á týndum sendingum eða tjóni sem kann að verða á vöru í flutningi. Við hvetjum þig því til að gæta vel að því að sumar vörur geta spillst, svo sem vegna hitabreytinga, í flutningi eða ef þær eru skildar eftir til afhendingar, t.d. fyrir utan heimili. Í versluninni koma fram upplýsingar um þau flutningafyrirtæki sem hverju sinni annast útkeyrslu á vörunum og hægt er að velja um.
2.9. Þegar um sérvöru er að ræða (á ekki við um veislurétti) er hægt að velja að fá þær sendar á tilteknar afgreiðslustöðvar, þar á meðal í svonefnd sjálfsafgreiðslubox, eða heim að dyrum. Slíkar vörur eru jafnan afhentar samdægurs á virkum dögum ef keypt er fyrir kl. 12:00 en vörur sem keyptar eru eftir þann tíma á föstudögum eru jafnan keyrðar út á mánudegi. Þó að stefnt sé að afhendingu innan sólarhrings getur það dregist, svo sem vegna óvenjumikils álags eða annarra óviðráðanlegra ástæðna. Sendingarkostnaður er 590 kr. á afgreiðslustöð og 1.290 kr. í heimkeyrslu fyrir hver vörukaup innan höfuðborgarsvæðisins en 1.090 kr. fyrir afgreiðslustöðvar og 1.990 kr. í heimkeyrslu fyrir sendingar utan þess. Ef verslað er fyrir meira en 12.900 kr. fellur sendingarkostnaður á afgreiðslustöð niður, en ef viðskiptavinur vill fá slíka sendingu heim að dyrum greiðir viðskiptavinur 800 kr.
2.10. Þegar veisluréttir eru keyptir í vefverslun er heimsendingardagur valinn í kaupferlinu. Einungis er hægt að kaupa veislurétti á höfuðborgarsvæðinu. Heimsendir veisluréttir eru keyrðir heim að dyrum, jafnan innan þess tímabils sem valið er í kaupferli en það getur dregist, svo sem vegna óvenjumikils álags eða annarra óviðráðanlegra ástæðna. Sendingargjald á hverri veisluréttarsendingu er 3.900 kr.
3. Skilafrestur og endurgreiðsluréttur
3.1. Eftir að þú hefur keypt hjá okkur fatnað eða sérvöru, t.d. leikföng, búsáhöld eða snyrtivörur, hefur þú 14 daga til að endursenda hana eða skila henni í einhverja verslun okkar, að því tilskildu að varan hafi ekki verið notuð, henni sé skilað í fullkomnu ástandi í upprunalegum og óskemmdum umbúðum, að innsigli hafi ekki verið rofið og að greiðslukvittun fylgi með. Ekki er þó hægt að skila veisluréttum, hreinlætisvöru, sundfatnaði, nærfatnaði, sokkum, sokkabuxum, tímaritum, útsöluvöru eða öðrum vörum sem lög undanskilja skilarétti, sbr. nú 18. gr. laga um neytendasamninga.
3.2. Ef þú ákveður að endursenda vöru sem heimilt er að skila þá berð þú ábyrgð á og kostnað af því nema þú hafir fengið ranga eða skemmda vöru afhenta. Endursendingar á vörum verða að berast okkur á póstfangið Hagkaup, Hagasmára 1, 201 Kópavogi, innan 14 daga frá móttöku vörunnar hjá þér.
3.3. Endurgreiðslur eru framkvæmdar með því að færa fjárhæð jafn háa verði hinnar skiluðu vöru aftur inn á sama greiðslumiðil, svo sem greiðslukort og greitt var með fyrir vöruna eða að öðrum kosti með því að gefa út inneignarnótu fyrir fjárhæðinni og senda hana á skráð netfang viðskiptavinar.
4. Lokun reiknings viðskiptavinar
4.1. Skráning þín sem viðskiptavinar verslunarinnar gildir ótímabundið, farir þú að viðskiptaskilmálunum. Ef þú vilt segja upp viðskiptum þínum þá gerir þú það með því að loka reikningi þínum á vefsetri verslunarinnar.
4.2. Okkur er heimilt að segja viðskiptum upp án fyrirvara og loka reikningi þínum án sérstakrar tilkynningar ef þú brýtur gegn viðskiptaskilmálunum. Þá áskiljum við okkur rétt til að krefjast skaðabóta vegna tjóns sem leiðir af brotum á þeim.
5. Gildandi lög og samningsvarnarþing
5.1. Um viðskiptaskilmála þessa gilda íslensk lög. Rísi dómsmál um ágreining milli aðila í tengslum við þá skal það mál rekið fyrir héraðsdómi Reykjavíkur.
5.2. Seljanda er allt að einu heimilt að leita aðstoðar dómstóla og stjórnvalda hvar í heimi sem er til framkvæmdar aðfarargerða eða annarra sambærilegra ráðstafana til að tryggja réttindi sín og fá skyldur samkvæmt viðskiptaskilmálunum uppfylltar.
1. Um þetta skjal
1.1. Í þessu skjali (hér nefndir persónuverndarskilmálarnir) er að finna upplýsingar um þá vinnslu persónuupplýsinga sem fer fram þegar þú kaupir vörur í vefversluninni Vefverslun Hagkaups (hér nefnd verslunin). Verslunin er rekin af okkur, Hagkaupi, kt. 430698-3549, Skútuvogi 5, 104 Reykjavík, s. 563-5000. Hagkaup er ábyrgðaraðili allrar vinnslu persónuupplýsinga í tengslum við verslunina og er smásölufyrirtæki í eigu félagsins Hagar verslanir ehf., kt. 470710-0390.
1.2. Í persónuverndarskilmálunum er fjallað um hvaða persónuupplýsingar við vinnum með í versluninni, tilgang vinnslunnar og heimildir fyrir henni, miðlun persónuupplýsinga og geymslutíma þeirra, auk ýmissa annarra atriða um þá vinnslu persónuupplýsinga sem fram fer í tengslum við verslunina.
2. Tegundir persónuupplýsinga, tilgangur vinnslunnar og heimildir fyrir henni
2.1. Til þess að við getum afgreitt þig í versluninni og veitt þér þá þjónustu sem boðið er upp á eða þú samþykkir sérstaklega að þiggja þurfum við að vinna með margs konar persónuupplýsingar, í ýmiss konar tilgangi og á grundvelli ólíkra heimilda. Þetta eru þær tegundir persónuupplýsinga sem við öflum beint frá þér en við öflum engra upplýsinga um þig annars staðar frá:
2.2. Tengiliðaupplýsingar, þ.e. nafn, heimilisfang og netfang: Þessar upplýsingar eru nauðsynlegar til að hægt sé að tryggja að ef þú óskar eftir að við sendum þér vörur þá sendum við þær á réttan stað, til að gefa okkur kost á að eiga í samskiptum um vörukaupin og til að tryggja að réttur viðskiptavinur sé skráður sem kaupandi, svo sem vegna reikningagerðar og ef kemur til vöruskila. Þá vinnum við einnig með þær vegna beinnar markaðssetningar ef þú hefur óskað eftir að fá almenn tilboð frá okkur eða tilboð sem eru sniðin að þér. Okkur er því nauðsynlegt að vinna með þessar upplýsingar vegna samnings þíns við okkur um vörukaupin, sem og vegna lagaskyldu sem hvílir á okkur, einkum vegna laga um neytendakaup, virðisaukaskatt og bókhald, auk þess að vera nauðsynleg til að veita þér framangreinda tilboðsþjónustu hafir þú óskað eftir að fá að njóta hennar. Að auki sendum við viðskiptavinum okkar af og til tölvubréf með aðstoð vinnsluaðila okkar þar sem boðið er upp á að taka þátt í þjónustukönnun þar sem könnuð er ánægja með verslunina. Sú vinnsla er okkur nauðsynleg vegna þeirra lögmætu hagsmuna okkar að leita eftir áliti viðskiptavina okkar á versluninni. Þátttaka í þjónustukönnunum er valkvæð og eingöngu er unnið með svör við henni á ópersónugreinanlegan hátt. Við leggjum okkur fram um að lágmarka þær persónuupplýsingar sem við vinnum með um þig og af þeim sökum vinnum við ekki með upplýsingar um kennitölu þína.
2.3. Greiðsluupplýsingar: Við vistum aldrei greiðslukortanúmer þitt heldur gefum þér, þegar kemur að því að greiða fyrir vörur og ef þú notar til þess greiðslukort, samband við færsluhirði þar sem þú slærð sjálf inn greiðslukortanúmer þitt og aðrar upplýsingar um það greiðslukort sem þú notar. Í staðinn fáum við frá færsluhirðinum staðfestingu á að skuldfærsla á greiðslukortið hafi tekist og þær upplýsingar vinnum við með í bókhaldslegum tilgangi. Því er okkur nauðsynlegt að vinna með þessar upplýsingar vegna samnings þíns við okkur um vörukaupin og vegna lagaskyldu okkar, einkum samkvæmt lögum um bókhald.
2.4. Upplýsingar um vörukaup þín hjá okkur, þ.e. hvaða vörur þú keyptir, hvenær og fyrir hvaða upphæð: Við vinnum með þessar upplýsingar, eins og með tengiliðaupplýsingarnar, sbr. hér að framan, í þeim tilgangi að geta selt og sent þér viðkomandi vörur og til að geta staðið við lagaskyldur okkar, svo sem varðandi vöruskil og endurgreiðslur. Þá bjóðum við þér upp á að við berum saman upplýsingar um þín vörukaup við aðra sölu á vörum í versluninni til að senda þér auglýsingar og gera þér tilboð sem sniðin eru að þér. Okkur er því nauðsynlegt að vinna með þessar upplýsingar vegna samnings þíns og okkar, vegna lagaskyldu sem hvílir á okkur og á grundvelli samþykkis, ef þú veitir okkur slíkt.
2.5. Auk þess að vinna með persónuupplýsingar notum við margs konar ópersónugreinanlegar upplýsingar til að starfrækja verslunina, t.d. tölfræðilegar upplýsingar um hvenær viðskiptavinir okkar versla hvaða vörur o.s.frv. Engar slíkar upplýsingar er hægt að rekja til tiltekins viðskiptavinar heldur er einungis um að ræða ópersónugreinanlegar upplýsingar um hópa viðskiptavina.
3. Miðlun persónuupplýsinga
3.1. Þeim persónuupplýsingum um þig sem við vinnum með vegna kortaútgáfunnar miðlum við ekki til þriðja aðila, svo sem til utanaðkomandi vinnsluaðila til dæmis til geymslu eða bókhaldsþjónustu, nema í eftirtöldum tilvikum:
3.2. Það upplýsingakerfi sem við notum til að reka verslunina er rekið af vinnsluaðila okkar og hýst, ásamt öllum upplýsingum, innan Evrópska efnahagssvæðisins (EES). Hins vegar er vakin sérstök athygli á því að þeir undirvinnsluaðilar sem veita okkur notendaþjónustu varðandi rekstur kerfisins eru sumir hverjir staðsettir fyrir utan EES en geta fengið aðgang að kerfinu til að aðstoða okkur varðandi atriði sem koma upp við rekstur kerfisins. Þessu fylgir mögulega áhætta vegna þess að þessir undirvinnsluaðilar kunna að vera staðsettir í ríkjum, einkum Bandaríkjunum, þar sem ekki liggur fyrir ákvörðun Evrópusambandsins um að vernd persónuupplýsinga sé fullnægjandi og viðeigandi verndarráðstafanir hafa ekki verið gerðar til að tryggja þær og vinnslu þeirra. Þess vegna er sérstaklega óskað eftir ótvíræðu samþykki þínu, sbr. ákvæði laga um persónuvernd og vinnslu persónuupplýsinga, nú a)-lið 1. mgr. 49. gr. laga nr. 90/2018, fyrir þeirri lýsingu á vinnslu persónuupplýsinga sem kemur fram í persónuverndarskilmálunum þessum, ef þú vilt eiga viðskipti við verslunina.
3.3. Bókhaldsgögn eru afhent innlendum endurskoðendum okkar eftir því sem þeir kunna að óska eftir lögum samkvæmt.
3.4. Við áskiljum okkur rétt til að hlíta fyrirmælum þar til bærra íslenskra dómstóla og eftirlitsstofnana um afhendingu gagna, þar á meðal þeirra sem kunna að innihalda persónuupplýsingar.
4. Geymslutími
4.1. Geymslutími þeirra persónuupplýsinga sem við vinnum með ræðst af þeim tilgangi sem þeirra er aflað í og þeirri heimild sem vinnslan byggist á. Þannig geymum við tengiliðaupplýsingar þínar ásamt upplýsingum um samþykki fyrir beinni markaðssetningu á meðan þú ert skráður notandi verslunarinnar. Rétt er að ítreka að notendur geta afskráð sig hvenær sem er og lokað aðgangi sínum fyrirvaralaust.
4.2. Við vinnum með upplýsingar um vörukaup þín ásamt greiðsluupplýsingum í þann tíma sem okkur er skylt vegna ákvæða í lögum um bókhald í lögum, þ.e. nú í minnst 7 ár en ekki lengur en í 10 ár.
5. Réttindi þín
5.1. Þar sem við vinnum, eins og kemur fram hér að framan, með persónuupplýsingar um þig þá hefur þú margs kyns réttindi sem mikilvægt er að þú fáir upplýsingar um:
5.2. Þú átt rétt á að óska eftir aðgangi að og afriti af persónuupplýsingum þínum hjá okkur, láta okkur leiðrétta þær ef þær eru rangar eða villandi eða láta okkur eyða þeim ef við höfum ekki lengur heimild til að vinna með þær. Þessum réttindum er nánar lýst í lögum um persónuvernd, sbr. nú 17. og 20. gr. laga nr. 90/2018, Þá átt þú samkvæmt síðarnefndu lagagreininni rétt á að flytja eigin gögn eða að við takmörkum vinnslu persónuupplýsinga um þig, að uppfylltum nánar tilteknum skilyrðum. Þú átt einnig rétt á að andmæla vinnslunni skv. 21. gr. laganna.
5.3. Þú getur hvenær sem er sent okkur fyrirspurn eða kvörtun vegna vinnslunnar, á netfangið personuvernd@hagar.is. Þá átt þú rétt á að leggja fram kvörtun hjá Persónuvernd vegna vinnslunnar. Skrifstofa hennar er að Rauðarárstíg 10, 105 Reykjavík og netfang hennar er postur@personuvernd.is.
6. Gildandi lög og samningsvarnarþing
6.1. Um viðskiptaskilmála þessa gilda íslensk lög. Rísi dómsmál um ágreining milli aðila í tengslum við þá skal það mál rekið fyrir héraðsdómi Reykjavíkur.
6.2. Þessi útgáfa persónuverndarskilmálanna er frá 4. janúar 2024 og gildir um alla vinnslu sem á sér stað frá og með þeim degi.
1. Um skilmálana
Þessir skilmálar fjalla um gjafakort Hagkaup („gjafakortið“). Með því að kaupa gjafakortið kemst á viðskiptasamningur milli kaupanda og útgefanda þess. Skilmálarnir eru hluti af þeim viðskiptasamningi og skiptast í notkunarskilmála sem eiga við um notkun gjafakortsins og persónuverndarákvæði sem eiga við um vinnslu persónuupplýsinga af hálfu útgefanda í tengslum við útgáfu og meðferð gjafakortsins.
2. Notkunarskilmálar
2.1. Eigandi gjafakortsins
Gjafakortið er eign útgefanda þess („útgefanda“), sem er Hagkaup, kt. 430698-3549, Skútuvogi 5, 104 Reykjavík, s. 563-5000, smásölufyrirtækis í eigu félagsins Hagar verslanir ehf., kt. 470710-0390. Hægt er að kaupa gjafakortið sem prentað kort eða sem rafrænt kort og hægt er að láta það í símaveski í farsíma (Android eða Apple iOS) hvers sem er en þar birtast þá upplýsingar um kortið, rétthafa og stöðu. Kaupandi gjafakortsins gefur við kaupin upp kt., annað hvort sína eða einhvers annars ef gjafakortið er til dæmis keypt sem gjöf. Ekki er hægt að breyta kt.-skráningu gjafakortsins. Við skráningu gjafakortsins á kt. eignast sá sem á þá kt. („rétthafi“) einn og óskorað allan rétt yfir stöðu kortsins á hverjum tíma, óháð því hvort gjafakortið hafi verið gefið út sem prentað kort sem annar en rétthafi hefur í vörslum sínum eða verið sett inn í símaveski hjá öðrum en rétthafa. Rétthafi og þeir sem hann veitir heimild til að nota kortið eru einungis vörsluaðilar gjafakortsins.
2.2. Notkun kortsins
Kortið er vara og stöðu á það er eingöngu hægt að nota til að greiða fyrir vörur í verslunum útgefanda. Ekki er hægt að skila gjafakortinu, millifæra af því eða innleysa það í skiptum fyrir reiðufé eða önnur verðmæti. Hægt er að nota gjafakort í eins mörg skipti og rétthafi kýs þar til það hefur verið tæmt. Ef kaupverð sem gjafakort er notað til að greiða fyrir er hærra en staða á gjafakortinu er hægt að greiða mismun með þeim greiðslumiðlum sem útgefandi tekur við.
2.3. Kaup á gjafakortum, upplýsingar um stöðu og áfylling
Á vef útgefanda, www.hagkaup.is og við afgreiðslukassa í verslunum hans er hægt að kaupa gjafakort, fá upplýsingar um stöðu á því og fylla á það. Ekki er hægt að kaupa gjafakort með gjafakorti. Það er alfarið á ábyrgð kaupanda gjafakorts að ganga úr skugga um það við kaup gjafakortsins að rétthafi sé rétt skráður og að staða gjafakortsins sé jafn há því kaupverði sem hann greiddi fyrir það.
2.4. Vöruskil
Sé vöru skilað sem keypt hefur verið með gjafakorti skal útgefandi endurgreiða hana á gjafakortið eða, sé gjafakortið ekki til staðar þegar vörunni er skilað, með því að færa slíka fjárhæð inn á annað gjafakort og afhenda þeim sem skilar vörunni.
2.5. Fyrning
Staða á gjafakorti fyrnist og verður verðlaus með öllu þegar fjögur ár eru liðin frá því að það var síðast annað hvort notað til að greiða fyrir vörur eða fyllt var á það.
2.6. Handhafakort
Kaupandi er einn ábyrgur fyrir allri notkun gjafakortsins, þar á meðal ef hann skráir það á aðra kt. en sína eigin. Útgefandi ber enga ábyrgð á notkun gjafakortsins, þar á meðal ef því er stolið, það týnist eða skemmist. Noti einhver annar gjafakortið en hefur heimild til þess þá er útgefanda ekki skylt að endurgreiða það eða bæta með neinum hætti. Verði kaupandi eða rétthafi var við slíkt ber honum að tilkynna útgefanda um það án tafar.
2.7. Notkun gjafakorts í ólögmætum tilgangi
Öll notkun gjafakortsins með ólögmætum hætti eða í ólögmætum tilgangi, svo sem í brotastarfsemi, til peningaþvættis eða til fjármögnunar hryðjuverka, er með öllu óheimil. Útgefandi áskilur sér rétt til að grípa til þeirra ráðstafana sem nauðsynlegar eru til að uppfylla lagaskyldur sínar í því sambandi, svo sem að tilkynna alla slíka notkun til lögreglu og til að loka þeim gjafakortum sem grunur leikur á að séu notuð í slíkum tilgangi.
3. Vinnsla persónuupplýsinga
Hér er að finna upplýsingar um þá vinnslu persónuupplýsinga sem fer fram af hálfu útgefanda í tengslum við útgáfu og meðferð gjafakortsins, hvernig sú vinnsla fer fram, í hvaða tilgangi og með hvaða heimild, hvaða tegundir af persónuupplýsingum er unnið með, hverjum þeim er miðlað til, hversu lengi upplýsingarnar verða geymdar, hver réttindi hinna skráðu eru varðandi vinnsluna og hvaðan upplýsingarnar eru fengnar. Þá kemur fram hvaða kröfur eru gerðar til þeirra sem vinna með persónuupplýsingarnar og hvernig hinn skráði getur stöðvað vinnslu persónuupplýsinga um sig og fengið upplýsingum um sig eytt.
3.1. Hvernig fer vinnslan fram?
Við skráningu kt. rétthafa („hins skráða“) er sú kt. skráð í upplýsingakerfi útgefanda ásamt neðangreindum persónuupplýsingum rétthafans. Þær persónuupplýsingar eru síðan lesnar og þær uppfærðar jafnóðum til að endurspegla notkun gjafakortsins og stöðu á því á hverjum tíma.
3.2. Hvaða persónuupplýsingar er unnið með og í hvaða tilgangi?
- Tengiliðaupplýsingar, þ.e. nafn, kennitala, símanúmer og netfang: Kaupandi gjafakortsins skráir þessar upplýsingar sjálfur ef hann kaupir gjafakortið á vef útgefanda eða gefur þær upp ef hann kaupir gjafakortið við afgreiðslukassa. Upplýsingarnar eru notaðar til að birta nafn viðtakanda á kortinu í símaveski, til að staðfesta kaup, mynda og senda greiðslukvittun auk þess að veita þjónustu og aðstoð vegna gjafakortsins.
- Kaupsaga: Hinn skráði hefur aðgang á vef útgefanda að ópersónugreinanlegum upplýsingum um öll kaup sem gjafakort sem er skráð á hans nafn hafa verið notuð í. Útgefandi notar þessar upplýsingar til að uppfylla lagakröfur sem á honum hvíla og til að veita hinum skráða framangreinda yfirsýn yfir kaup sín.
- Handahófskennd auðkennisnúmer: Þetta er notað sem einkvæmt auðkenni til að halda gögnum hins skráða aðskildum frá gögnum annarra.
3.3. Í hvaða tilgangi er unnið með persónuupplýsingar hins skráða?
Unnið er með persónuupplýsingar í tengslum við gjafakortið eingöngu í þeim tilgangi að veita hinum skráða þá þjónustu sem fjallað er um í notendaskilmálunum hér að framan og til að uppfylla lagaskyldur sem hvíla á útgefanda.
3.4. Hvaða heimild er til að vinna við með persónuupplýsingar um hinn skráða?
Öll framangreind vinnsla persónuupplýsinga um hinn skráða í tengslum við gjafakortið er útgefanda nauðsynleg til að efna samningsskyldur útgefanda gagnvart hinum skráða samkvæmt framangreindum notendaskilmálum.
3.5. Hvert er persónuupplýsingum um hinn skráða miðlað?
Persónuupplýsingum hins skráða er miðlað til vinnsluaðila útgefanda sem annast vinnslu þeirra til að veita hina umsömdu þjónustu. Gerðir hafa verið vinnslusamningar við viðkomandi í samræmi við ákvæði réttarreglna um persónuvernd. Útgefandi gerir þær kröfur til sérhvers vinnsluaðila að unnið sé með persónuupplýsingar hinna skráðu á að minnsta kosti jafn öruggan hátt eða öruggari en lýst er í þessum skilmálum og er krafist í gildandi réttarreglum um persónuvernd. Útgefandi áskilur sér rétt til að skipta um vinnsluaðila, að uppfylltum ákvæðum laganna. Útgefandi afhendir ekki upplýsingar um hina skráðu í öðrum tilvikum nema á grundvelli fyrirmæla í settum réttarreglum eða niðurstöðum dómstóla eða þar til bærra stjórnvalda.
3.6. Hversu lengi verða persónuupplýsingar hins skráða geymdar?
Unnið er með persónuupplýsingar hins skráða þar til öll gjafakort sem eru skráð á hans nafn eru fallin úr gildi. Eftir það geymir útgefandi upplýsingarnar í þann tíma sem honum er skylt vegna ákvæða í lögum, einkum lögum um bókhald, þ.e. nú í minnst 7 ár en ekki lengur en í 10 ár. Sumar upplýsingar kunna þó að verða geymdar styttra eða alls ekki.
3.7. Hver eru réttindi hins skráða varðandi vinnsluna?
Hinn skráði á rétt á að óska eftir aðgangi að og afriti af persónuupplýsingum sínum hjá útgefanda, láta hann leiðrétta þær ef þær eru rangar eða villandi eða láta hann eyða þeim ef hann hefur ekki lengur heimild til að vinna með þær. Þessum réttindum er nánar lýst í lögum um persónuvernd, sbr. nú 17. og 20. gr. laga nr. 90/2018. Hinn skráði á samkvæmt síðarnefndu lagagreininni einnig rétt á að flytja eigin gögn eða að útgefandi takmarki vinnslu persónuupplýsinga um hinn skráða, að uppfylltum nánar tilteknum skilyrðum. Hann á einnig rétt á að andmæla vinnslunni skv. 21. gr. laganna og rétt á að leggja fram kvörtun hjá Persónuvernd vegna vinnslunnar. Skrifstofa hennar er að Laugavegi 166, 105 Reykjavík og netfang hennar er postur@personuvernd.is
3.8. Hvaðan eru persónuupplýsingarnar fengnar?
Eingöngu er unnið með þær persónuupplýsingar sem kaupandi gjafakortsins lætur útgefanda sjálfur í té.
3.9. Hvernig getur hinn skráði látið stöðva vinnsluna og fengið upplýsingum um sig eytt?
Hinum skráða er ekki skylt að afhenda útgefanda neinar upplýsingar. Einu afleiðingar þess að persónuupplýsingar um hinn skráða eru ekki afhentar útgefanda eru að gjafakort fæst ekki skráð á nafn viðkomandi.
Hinn skráði getur hvenær sem er afskráð öll gjafakort af nafni sínu með því að hafa samband við skrifstofu útgefanda. Við afskráningu gjafakorts af nafni hins skráða lokast það, allt eyðist af kortinu og staða þess núllast. Þá eyðast innan þriggja mánaða allar persónuupplýsingar sem útgefandi hefur um hinn skráða nema þær sem eru á öryggisafritum eða geymdar eru vegna lagakrafna en aðgangur að þeim er skertur. Þær upplýsingar eyðast svo í samræmi við það sem kemur fram hér að framan um geymslutíma upplýsinga um hinn skráða.
Hafðu samband
Ávallt er hægt að hafa samband við útgefanda á netfanginu gjafakort@hagkaup.is um hvaðeina sem tengist gjafakortinu eða vinnslu persónuupplýsinga í tengslum við það.
Gildandi lög og varnarþing
Um gjafakortið og þessa skilmála gilda íslensk lög. Rísi réttarágreiningur í tengslum við gjafakortið, svo sem um vinnslu persónuupplýsinga því tengda, skal bera hann undir héraðsdóm Reykjavíkur.
Útgáfa skilmálanna
Þetta er útgáfa 1.0 af þessum skilmálum en hún gildir frá 19. mars 2026. Útgefandi áskilur sér rétt til að breyta skilmálunum án fyrirvara. Gildandi útgáfu þeirra er ávallt finna á vefsíðu útgefanda.