27. Júní 2025

Hagkaup kynnir með stolti: úrvals íslenskt Angus nautakjöt frá Nýjabæ undir Eyjafjöllum í takmörkuðu magni.

Það er okkur hjá Hagkaup sönn ánægja að bjóða nú í fyrsta sinn úrvals Angus holdanaut frá Nýjabæ undir Eyjafjöllum. Hér er um að ræða hágæðakjöt sem sameinar íslenskan uppruna, sjálfbæra ræktun og einlægan metnað einstakra bænda.

Að baki Nýjabæ eru hjónin Jón Örn Ólafsson og Edda G. Ævarsdóttir, sem hafa á undanförnum árum byggt upp öflugt holdanautabú frá grunni. Þau hafa helgað sig ræktun Angus-nauta með áherslu á dýravelferð og gæði, og rækta nær eingöngu á íslensku fóðri, grasi, heyi og heimaræktuðu byggi. Með sérstakri áherslu á norskt erfðaefni hafa þau náð að þróa gripi sem skila sér í framúrskarandi kjötgæðum.

Það sem gerir þetta bú jafnframt sérstakt er hugsjónin sem þar býr að baki. Jón Örn og Edda vinna markvisst að sjálfbærari landbúnaði, taka þátt í loftslagsverkefnum og leggja sig fram um að rækta í sátt við náttúruna með ábyrga framtíðarsýn og virðingu fyrir jörðinni.

Kjötið frá Nýjabæ er nú fáanlegt í takmörkuðu magni í Hagkaup Garðabæ og Skeifunni, en við vonumst til að framleiðslan stækki í framtíðinni svo við getum boðið þessa gæðavöru í fleiri verslunum. Við hvetjum viðskiptavini okkar eindregið til að grípa tækifærið  því hér er um að ræða einstaka íslenska vöru, alið og unnið af mikilli fagmennsku og hjartahlýju.

Við erum stolt af því að fá að vera hluti af þessari vegferð með þeim hjónum á Nýjabæ og hlökkum til að kynna ykkur fyrir bragðgæðum sem segja sína eigin sögu.