18. Febrúar 2026
Frægur danskur kokkur heldur sælkerakvöld í Hagkaup
Hagkaup kynna nú einstakan viðburð þegar danski stjörnukokkurinn Casper Sobczyk kemur til landsins og heldur glæsilegt sælkerakvöld í verslun Hagkaups. Viðburðurinn verður haldinn þriðjudaginn 24. febrúar frá klukkan 17.30 til 19.00. Um er að ræða sérstakt matreiðslukvöld þar sem gestir fá að upplifa matargerð í hæsta gæðaflokki, hitta kokkinn sjálfan og smakka á réttum sem hann útbýr á staðnum.
Casper Sobczyk hefur yfir tuttugu ára reynslu í matargerðarlist og hefur meðal annars verið hluti af danska landsliðinu í matreiðslu. Hann er eigandi hins virta Capa Restaurant í Kaupmannahöfn sem hefur hlotið viðurkenningu sem einn af 25 bestu steikarstöðum heims. Samhliða heimsókninni kynnir hann faglega eldhúslínu sína, Casper Sobczyk Professional Kitchenware Collection, eina mest seldu vörulínu sinnar tegundar í Danmörku. Línan sameinar hágæða efni, faglega hönnun og virkni sem gerir heimiliseldamennsku bæði einfaldari og skemmtilegri.
Á viðburðinum mun Sobczyk sýna hvernig rétt verkfæri geta skipt sköpum í eldhúsinu, deila faglegum ráðum og svara spurningum gesta. Gestir eiga jafnframt kost á að vinna vinsælar vörur úr línunni.
„Við í Hagkaup erum ótrúlega spennt fyrir þessu tækifæri að fá þekktan kokk til okkar og bjóða viðskiptavinum okkar upp á einstaka kvöldstund með honum. Þetta er sannarlega hluti af þeirri vegferð okkar að bjóða upp á einstaka upplifun í verslunum okkar þar sem við sameinum gæði, innblástur og skemmtilega viðburði,“ segir Eva Laufey Kjaran, markaðs- og upplifunarstjóri hjá Hagkaup.
Hún tekur fram að sætaframboð sé takmarkað og því um að gera að hafa hraðar hendur og skrá sig sem fyrst hér. „Um er að ræða einstakt tækifæri fyrir matgæðinga og áhugafólk um eldamennsku; að upplifa alþjóðlega fagmennsku beint í Hagkaup.“
