15. Maí 2026

Dásamlega djúsí frönsk súkkulaðikaka

Þessi franska súkkulaðikaka er fullkomin fyrir kosningapartýið, helgarkaffið, Eurovisionpartýið eða hvað sem er! Svo undurgóð og djúsí! Smelltu hér til að sjá myndband.

Uppskrift:
4 egg
390 g sykur
200 g smjör
200 g suðusúkkulaði
190 g hveiti
2 tsk. vanillusykur
½ tsk. salt

Hitið ofninn í 175°C og setjið bökunarpappír í botninn á um 22-24 cm smelluformi, spreyið það síðan vel að innan með matarolíuspreyi. Bræðið saman smjör og súkkulaði og leyfið hitanum að rjúka úr á meðan annað er undirbúið. Þeytið saman egg og sykur. Hellið súkkulaðibráðinni saman við í mjórri bunu og hrærið saman við á hægum hraða. Bætið loks þurrefnunum saman við og blandið stutt saman.

Hellið í formið og bakið í 50 mínútur (m.v 22 cm form, það má stytta bökunartímann um 5-10 mín fyrir 24 cm form). Kælið kökuna síðan alveg áður en þið takið hana úr forminu, útbúið kremið á meðan.

Krem og skreyting
120 g suðusúkkulaði
50 g smjör
3 msk. sykur
1 msk. bökunarkakó
2 msk. sýróp (í grænu dósunum)
30 ml rjómi
Þeyttur rjómi til að bera fram með
Ber að eigin vali til að skreyta
Saxið suðusúkkulaðið gróft og leggið til hliðar.

Setjið smjör, sykur, bökunarkakó, sýróp og rjóma í pott og hitið að suðu, hrærið vel í allan tímann. Lækkið hitann þá niður og hrærið í nokkrar mínútur þar til slétt og samfelld súkkulaðibráð hefur myndast og sykurinn er bráðinn. Bætið nú saxaða suðusúkkulaðinu saman við og hrærið þar til það bráðnar.

Kælið blönduna þar til hún þykknar (tekur um 20 mínútur), gott að hræra í henni reglulega allan tímann og þegar blandan minnir á þykka karamellusósu má smyrja henni yfir kökuna og kæla hana aftur. Þegar kremið hefur náð að stífna á kökunni má skreyta hana með berjum og bera fram með þeyttum rjóma.