11. Júní 2025

Hagkaup hlýtur viðurkenningu frá Stúdentaráði fyrir þátttöku í sjálfbærniáskorun

Ásthildur Bjarkadóttir og Fannar Gíslason fulltrúar í Stúdentaráði afhentu nú á dögunum Hagkaup viðurkenningu fyrir framúrskarandi árangur í verkefninu Stúdentar taka til.

Ásthildur Bjarkadóttir, fulltrúi Stúdentaráðs, sagði við það tilefni:
„Við hjá Stúdentaráði viljum óska Hagkaup innilega til hamingju með glæsilegan árangur í áskoruninni Stúdentar taka til, þar sem fyrirtæki eru hvött til að taka þátt í sjálfbærnivegferð í samstarfi við Laufið. Hagkaup hefur nú þegar náð sjálfbærnimarkmiðum stúdenta fyrir árið 2025. Þetta er virkilega verðugt afrek sem sýnir bæði metnað og raunverulega skuldbindingu til sjálfbærrar starfsemi.“

Svanberg frá Hagkaup tók við viðurkenningunni og sagði:
„Það er mikill heiður að fá slíka viðurkenningu, og það hefur verið virkilega ánægjulegt að vinna með Stúdentaráði að þessu verkefni. Við erum þakklát fyrir áskorunina og stolt af okkar árangri.“

Verkefnið Stúdentar taka til er sjálfbærniátak í samstarfi við Laufið, þar sem áhersla er lögð á að virkja fyrirtæki í átt að sjálfbærari framtíð með stuðningi ungs fólks og nýrrar tækni. Hingað til hefur Stúdentaráð skorað á 331 fyrirtæki, en 43 þeirra, þar á meðal Hagkaup, hafa þegar tekið áskoruninni.