29. September 2022

Hagkaup stendur fyrir söfnun til styrktar Bleiku slaufunnar

Bleika slaufan er árlegt árvekni- og fjáröflunarátak Krabbameinsfélagsins tileinkað baráttu gegn krabbameini hjá konum. Hagkaup er stoltur söluaðili Bleiku slaufunnar og við ætlum einnig að styrkja átakið með því að bjóða okkar viðskiptavinum að leggja söfnuninni lið í verslunum okkar. Verður viðskiptavininum boðið að bæta 500 krónum við innkaup sín sem renna til söfnunarinnar og mun Hagkaup leggja til aðrar 500 krónur í mótframlagi.

„Okkur í Hagkaup er bæði ljúft og skylt að styrkja átakið með þessum hætti því öll höfum við því miður einhver tengsl við krabbamein, beint eða óbeint. Krabbameinsfélagið vinnur einstakt starf og við erum gífurlega stolt að taka þátt í átakinu og hvetjum að sjálfsögðu alla til þess að styðja við átakið“ Eva Laufey Kjaran Hermannsdóttir markaðs- og upplifunarstjóri Hagkaups.

„Bleika slaufan gegnir afar stóru hlutverki í markaðs- og fjáröflunarstarfi Krabbameinsfélagsins og gerir félaginu kleift að vinna að sínum meginmarkmiðum sem eru að fækka þeim sem veikjast af krabbameini, að lækka dánartíðni þeirra sem greinast með krabbamein og að bæta lífsgæði þeirra sem greinast og aðstandendur þeirra.  Hagkaup er í okkar dýrmæta hópi samstarfsaðila sem bæði selja slaufuna en láta líka hluta af sölu renna til Krabbameinsfélagsins. Slaufan kemur í sölu um allt land föstudaginn 30.september og okkur þætti afar vænt um að sjá hana í barminum á sem flestum“  Árni Reynir Alfreðsson forstöðumaður markaðs- og fjáröflunar hjá Krabbameinsfélaginu

Bleika slaufan verður til sölu í öllum Hagkaups verslunum og einnig er hægt að versla hana hér í vefverslun.