Kalkúnaveisla með öllu tilheyrandi

20. Nóvember 2026

Kalkúnaveisla með öllu tilheyrandi

Berglind hjá Gotterí og gersemum hefur prófað ófáar aðferðir við eldun á kalkúni og kalkúnabringum! Það var kominn tími til að setja hingað inn kalkúnaskip fyrir ykkur og ef ég á að vera hreinskilin held ég að þetta sé nýja uppáhalds kalkúnakjötið mitt. Þetta smjörsprautaða kjöt var svo djúsí og gott og allir sammála sem það smökkuðu. Einfalt og þægilegt í eldun og ég held það sé erfitt að láta þetta klikka!

Kalkúnaskip og meðlæti
Fyrir 8-10 manns

Kalkúnaskip eldun
1 x smjörsprautað kalkúnaskip frá Hagkaup (um 3 kg)

Takið kalkúnaskipið úr umbúðunum og komið fyrir á ofnskúffu. Hitið við 180°C þar til kjarnhiti nær 70°C, gott er að breiða álpappír lauslega yfir þegar um klukkustund er liðin af eldunartímanum til að skinnið verði ekki of dökkt. Umbúðirnar mæla með 45 mínútum fyrir hvern klukkutíma en það er misjafnt eftir ofnum hvenær bringurnar ná 70° kjarnhita.

Ég var með tæplega 3 kg skip og það var nóg að elda það í 1 klukkustund og 50 mínútur. Mikilvægt er að leyfa bringunum að standa í að minnsta kosti 15 mínútur og þær þola að standa undir álpappír í allt að klukkustund áður en borið er að borð.

Sætkartöflumús uppskrift
4-5 stk. sætar kartöflur
½ tsk. salt
3 msk. smjör við stofuhita
2 egg (pískuð)
1 tsk. vanilludropar
½ tsk. kanill
100 g sykur
2 msk. rjómi

Kröst ofan á
60 g hveiti
60 g smjör við stofuhita
40 g púðursykur
20 g hvítur sykur
50 g saxaðar pekanhnetur

Skrælið kartöflurnar og skerið í nokkra bita, sjóðið þar til bitarnir mýkjast. Setjið kartöflubitana í hrærivélarskál ásamt öllum öðrum hráefnum og blandið saman og hellið í eldfast mót. Útbúið kröstið með því að hræra saman öllum hráefnunum nema pekanhnetum. Stráið deiginu jafnt yfir kartöflumúsina og einnig pekanhnetunum. Bakið í ofni við 180°C í um 20 mínútur eða þar til kröstið fer aðeins að gyllast.

Kalkúnafylling sem meðlæti
1 x Stonewall Kitchen stuffing mix
150 g smjör
1 x laukur
100 g gulrætur
600 ml kjúklingasoð
Salt og pipar

Saxið lauk og rífið niður gulrætur. Steikið upp úr smjörinu þar til grænmetið fer að mýkjast, saltið og piprið eftir smekk. Hellið soðinu á pönnuna og því næst stuffing-mixinu. Leyfið brauðmolunum að draga í sig vökvann á pönnunni í um 5 mínútur, færið yfir í eldfast mót og bakið í ofni í 20-30 mínútur.

Sveppa- piparostasósa
1 x Piparosta rjómasósa frá íslandssósum
300 g sveppir að eigin vali
50 g smjör
300 ml rjómi
Nautakraftur, salt og pipar

Steikið sveppina upp úr smjöri og kryddið eftir smekk. Hellið tilbúnu piparosta sósunni saman við ásamt rjómanum. Setjið um 1 msk. af fljótandi nautakrafti saman við og kryddið frekar ef ykkur finnst þurfa.

Annað meðlæti
Gular baunir
Stonewall Kitchen Traditional Cranberry Spread