9. Apríl 2026

Kjúklingasalat með vínberjum

Þetta kjúklingasalat minnir einna helst á ostassalat nema þetta er stútfullt af próteini. Einstaklega ferskt og gott. Innihaldið er ekki heilagt, það má breyta og skipta, en vínberin eru algjörlega ómissandi.

Innihald:
3 - 4 kjúklingabringur (875 g)
2 paprikur (400 g)
400 g rauð vínber
60 g blaðlaukur
100 g feta ostur
200 g grísk jógúrt
Safi úr einni límónu
Salt og pipar eftir smekk
Rotisserie chicken kjúklingakrydd frá Badia

Þú byrjar á að krydda kjúklinginn með kjúklingakryddi og elda hann, mér finnst þægilegt að grilla hann en það má einnig steikja hann. Á meðan kjúklingurinn er að eldast eru paprikurnar skornar í litla bita og vínberin skorin í tvennt eða fernt eftir því hverju þú nennir. Skerð einnig blaðlaukinn og blandar þessu saman í skál ásamt feta ostinum. Blandið saman grískri jógúrt og safa úr einu lime i og hellið yfir salatið og blandið saman.

Mér finnst gott að bera kjúklingasalatið fram með fersku salati sem ég set í botninn á disknum, einnig er gott að hafa súrdeigs snittubrauð með.

Þú finnur þessa skráningu í Myfitnesspal appinu með því að leita að: Helga Magga eða Kjúklingasalat með vínberjum.

Smelltu hér til þess að sjá TikTok myndband af því hvernig Helga Magga bjó réttinn til.