28. September 2026
Lækkað verð á um 1000 vörum
Verð hefur verið lækkað tímabundið á um þúsund vörum í verslunum Hagkaups og Bónus. Með þessu vilja Hagar, eigandi verslananna, styðja við samstöðu aðila vinnumarkaðar og stjórnvalda um að ná niður verðbólgu og vöxtum.
Vöruverðið lækkaði um tvö prósent og gildir til áramóta og nær lækkunin til stórs hluta innflutnings Haga. Lækkunin mun ná til vöruflokka dagvöru, meðal annars hilluvara, frysti- og kælivara, drykkjarvara, hreinlætisvara og snyrtivara. Þrjú vörumerki vega þyngst í aðgerðinni en það eru vörumerkin Euroshopper, vörulínur Salling og Santa Maria.
„Lægri verðbólga og lægri vextir eru hagsmunamál sem snertir samfélagið allt, frá heimilum til fyrirtækja landsins. Hátt vaxtastig þyngir m.a. fjármagnskostnað, dregur úr fjárfestingargetu og veikir kaupmátt landsmanna. Eitt stærsta hagsmunamál samfélagsins um þessar mundir er að ná niður vöxtum og verðbólgu og hefur þörfin á samstilltu átaki sjaldan verið meiri,“ segir í tilkynningunni frá Högum.
Finnur Oddsson hvetur stjórnvöld til að ganga á undan í baráttunni gegn verðbólgunni með góðu fordæmi.
„Hagar skorast ekki undan ábyrgð og ég treysti því að aðgerð okkar verði öðrum hvatning til dáða og að hún stuðli þannig að verðstöðugleika, friði á vinnumarkaði og lækkun vaxta, öllum til hagsbóta,“ er haft eftir Finni.
