31. Mars 2026
Páskalamb með öllu tilheyrandi
Helga Magga segir veislulæri frá Hagkaup ómissandi á páskunum. Hér deilir hún með okkur gómsætri uppskrift að lambalæri með öllu tilheyrandi, einföldum og þægilegum rétti sem krefst lítillar viðveru í eldhúsinu.
Innihald:
Veislulæri frá Hagkaup
Kartöflur
Sellerírót
Rauðrófa
Perlulaukur eða skarlottulaukur
Gulrætur
Fennel
Ferskt garðablóðberg
Olía, salt og pipar
Rósakál 2 pokar
30 ml olía
30 ml balsamik edik
Salt
2 msk maple sýróp
Granateplafræ og feta ostur ofan á eftir smekk
Sósan tilbúin Villisveppasósa frá Ellu Stínu
Ég elda lærið í steikarfati og sker niður grænmeti sem fer í botninn. Ég elska að notast við rótargrænmeti en þú notar það grænmeti sem þú elskar. Að setja niðurskornar rauðrófur með grænmetinu var skemmtilegt, þær lita hitt grænmetið örlítið.
Krydda með salti, pipar og fersku rósmaríni og set smá olíu yfir grænmetið ásamt um 1 dl af vatni. Í lokin bætti ég svo við fersku garðablóðbergi. 2 kg lambalæri elda ég fyrstu 30 mínúturnar við 200 gráður, lækka svo hitann í 150 gráður og elda í um 70 mínútur í viðbót, eða þar til kjarnhitinn nær 63 gráðum (mælt með kjöthitamæli). Ég grilla lærið í 5 mínútur í ofninum í lokin og læt það síðan hvíla í um 15 mínútur áður en það er borið fram.
Með lambalærinu var ég með bakað rósakál, ég skar það í tvennt og snyrti. Setti í skál og hellti olíu yfir og balsamik ediki, kryddaði með salti og bætti sýrópinu við. Rósakálið er bakað við 200 gráður í 30 - 35 mínútur. Einnig hægt að baka það í ofninum með lambalærinu á 150 gráðu hita en þá þarf að baka það örlítið lengur, í um 45 mínútur.
Ég var að prófa villilsveppasósuna frá Ellu Stínu í fyrsta sinn og hún var mjög góð. Ég bætti eingöngu út í hana soðinu af kjötinu og grænmetinu, en það geri ég alltaf þegar ég er með kjöt og sósur. Einfalt, þægilegt og mjög gott.
