2. Júní 2025

Shake&Pizza vörulínan komin í Hagkaup

Pítsustaður­inn Shake&Pizza, í Keilu­höll­inni Eg­ils­höll, hef­ur í ár­araðir verið einn af vin­sælustu pítsustöðum lands­ins og er þekkt­ur fyr­ir að vera með frum­legar og öðru­vísi pítsur. Á mat­seðli staðar­ins má meðal ann­ars finna hina frægu Beikonsultupítsu sem val­in var fjórða besta pítsa í heimi á In­ternati­onal Pizza Expo í Las Vegas.

Á dög­un­um var ný vöru­lína Shake&Pizza kynnt til leiks í Hag­kaup og er nú fá­an­leg í öll­um versl­un­um keðjunn­ar. Sam­starf Hag­kaups og Shake&Pizza hef­ur verið í smíðum í þónokk­urn tíma en er nú orðið að veru­leika að því fram kem­ur í til­kynn­ingu frá Shake&Pizza.

„Nú geta metnaðarfull­ir heima­bak­ar­ar þessa lands tekið gleði sína og nálg­ast allt hrá­efnið í pítsu­gerðina í versl­un­um Hag­kaups,“ seg­ir Jó­hann­es Ásbjörns­son, alla jafna kallaður Jói, einn af eig­end­um Shake&Pizza.

„Vöru­lín­an er heil­steypt og inni­held­ur allt sem þarf til að baka al­vöru Shake&Pizza pítsu heima fyr­ir. Í vöru­lín­unni er meðal ann­ars deigið, pítsusós­an, beikonsultan, se­mol­ina-duftið, hvít­laukss­mjörið, osta­blöndan frá Shake&Pizza, chili-olí­an, hvít­lauk­solían og hvít­lauk­stopp­ingsósan,“ seg­ir Jói með bros á vör. 

Var vígð á Garðatorgi á dög­un­um
Nýja vöru­lín­an var vígð með pompi og prakt í Hag­kaupá Garðatorgi ný­verið þar sem pítsa­bak­ar­ar Shake&Pizza bökuðu pítsur fyr­ir gesti versl­un­ar­inn­ar.

„Það er virki­lega gleðilegt að Shake&Pizza vör­urn­ar séu komn­ar með fasta bú­setu í versl­un­um Hag­kaups. Sam­starfið við Evu Lauf­eyju og henn­ar teymi hef­ur verið frá­bært og mik­ill metnaður er lagður í að skapa vöru­línu sem hent­ar breiðum hópi viðskipta­vina,“ bæt­ir Jói við.

Nýr „PopÖpp“-mat­seðill Evu Lauf­eyj­ar
Sam­hliða sam­starf­inu við Hag­kaup var ákveðið að út­færa nýj­an „PopÖpp“-mat­seðil í sam­starfi við Evu Lauf­eyju á Shake&Pizza. Þar get­ur að líta fjór­ar pítsur eft­ir upp­skrift­um henn­ar.

„Það er svo gam­an að gera pítsur. Mögu­leik­arn­ir eru enda­laus­ir. Og þegar kem­ur að sam­starfi við Shake&Pizza þá eru all­ir opn­ir fyr­ir nýj­um hug­mynd­um. Pítsurn­ar á pop up-mat­seðlin­um eru svolítið úr öll­um átt­um, en eiga það sam­eig­in­legt að hafa slegið í gegn á mínu heim­ili,“ seg­ir Eva Lauf­ey.

„Pítsurn­ar eru bæði frum­leg­ar og flott­ar, bæði hvað varðar álegg­in og nöfn­in á þeim,“ seg­ir Jó­hann­es. „Má þar nefna Eva Sombrero sem er mexí­kósk­ur pít­sa­draum­ur með tex mex kjúk­lingi, Eva Masala sem er ind­verskt pítsaund­ur með Tikka masala, og síðan er það Ost sem við fyrstu sýn er eins og nafnið gef­ur til kynna osta­veisla.

Loks er það rús­ín­an í pylsu­end­an­um, píts­an Burrata Parma­skinku­dótt­ir sem skart­ar heilli burrata osta­kúlu, parma­skinku og chili hun­angi,“ seg­ir Jói enn frem­ur og hvet­ur alla til að koma og smakka pítsurn­ar henn­ar Evu Lauf­eyj­ar.