18. Júlí 2026

Við viljum gera grillið einfaldara, betra og bragðmeira

Sumarið á Íslandi hefur alltaf sinn sérstaka takt. Dagarnir lengjast, sumarfríin taka við hvert af öðru og heimilin fyllast af léttleika, ferðalögum, golfi og auðvitað grilllykt. Fyrir marga er þetta árstími þar sem matarvenjur breytast, eldhúsið færist út á pall og einfaldleikinn verður í fyrirrúmi. Hjá Hagkaup hefur þessi árstími lengi verið stór og mikilvægur, enda tengist hann bæði hefðum og nýjungum í matarvali landsmanna.

Sigurður Reynaldsson, framkvæmdastjóri Hagkaups, segir að sumarið sé á sama tíma bæði skemmtilegt og krefjandi tímabil í rekstrinum, en einnig frábært tækifæri til að mæta þörfum viðskiptavina með sterkri vöruþróun og fjölbreyttu úrvali.

Hann tók á móti Bolla Má Bjarnasyni, útvarpsmanni og uppistandara, í nýju kynningarmyndbandi frá Hagkaup. Hér er brot úr myndbandinu en vænta má lengri útgáfu.

„Það er allt gott að frétta,“ segir Sigurður þegar hann er spurður hvað sé helst á döfinni þessa dagana. „Þessi tími ársins er alltaf smá sérstakur. Sumarfríin eru að byrja í júní og enda hjá flestum í ágúst, þannig að það er ekki fullskipað lið alla daga eins og venjulega. Það er því alltaf smá áskorun að halda úti sömu sterku þjónustu allt sumarið. En hópurinn okkar er sterkur og leysir þetta mjög vel. Við erum heppin að vera með reynslubolta sem hafa farið í gegnum þetta margoft áður og kunna takta sumarsins.“

Ánægður með Ísland á sumrin
Þrátt fyrir að margir tengi sumarið helst við ferðalög og sólarlandaferðir segir Sigurður að hann sjálfur sé ekki mikið fyrir sumarbakpoka eða strandlíf á þessum árstíma. „Nei, ég er eiginlega meira fyrir vetrarfrí,“ segir hann og brosir. „Ég reikna frekar með einni ferð í sólina þegar svartasta skammdegið gengur í garð og svo vonandi golfferð næsta vor. Mér finnst bara mjög fínt að vera á Íslandi á sumrin þegar veðrið er með skásta móti. Þá nýtur maður þess að hafa bjartar nætur, lengja helgarnar og reyna að spila eitthvert golf í lok dags. Það er ákveðinn lúxus í því.“

Aðspurður hvort hann hafi þó farið eitthvað innanlands í sumar segist hann vera nýkominn úr ferð sem hafi minnt hann á hvað Ísland hafi upp á margt að bjóða. „Ég var að koma úr Þórsmörk um síðustu helgi þar sem ég tók á móti syni mínum sem var að hlaupa í Laugavegshlaupinu. Það er alltaf geggjað að koma í Þórsmörk. Þar finnur maður vel fyrir því hvað íslensk náttúra er stórkostleg og hvað sumarið hér heima getur verið einstakt.“

Ég er frekar hefðbundinn á grillinu
Þegar talið berst að mat og grillmenningu viðurkennir Sigurður fúslega að hann sé ekki mikið fyrir að elta alla nýjustu straumana í eldamennsku þegar sumarið gengur í garð. „Ég skal alveg viðurkenna að það hefur lítið nýtt verið að gerast hjá mér í sumar,“ segir hann. „Ég er frekar hefðbundinn á grillinu. Það verður líka að viðurkennast að mikill áhugi okkar hjóna á að spila golf eftir vinnu hefur fækkað grillstundum á pallinum. Þannig að þetta hefur verið aðeins minna tilstand en stundum áður.“

Það þýðir þó ekki að grillið sé ekki í fullri notkun á heimili hans. Þvert á móti segist hann halda tryggð við klassíkina. „Við erum alltaf hrifin af íslenska lambinu og kótilettur eru því mjög oft á grillinu hjá okkur. Við í Hagkaup erum að marinera nokkrar útgáfur af þeim og ég reyni að eiga alltaf pakka af þeim í kælinum. Síðan finnst mér líka mjög gaman að fá mér nautasteik einu sinni í viku og þá er ribeye alltaf fyrsta val.“

Grillað með Hagkaup vekur athygli
Sumarið hefur líka verið stórt hjá Hagkaup þegar kemur að grillvörum, en herferðin Grillað með Hagkaup hefur vakið athygli víða. Sigurður segir að hugsunin á bak við hana sé einföld: að gera viðskiptavinum auðveldara að grilla vel án þess að þurfa að verja miklum tíma í undirbúning. „Íslendingar elska að grilla og okkur finnst mjög gaman að geta hjálpað viðskiptavinum okkar að gera það á einfaldan hátt. Matarþróun landans hefur mjög mikið snúist um að einfalda lífið síðustu ár. Við höfum oft rætt þetta í kringum hátíðarmatinn, en þetta á alveg jafn vel við um sumarið og grillið.“

Hann segir að sífellt fleiri vilji góða máltíð án þess að þurfa að hefja undirbúning mörgum klukkutímum fyrir matartíma. „Við höfum því lagt áherslu á að taka sem mest af undirbúningsvinnunni fyrir fólk. Við erum búin að marinera kjötið, við bjóðum tilbúnar sósur og svo er meðlætið í alls konar útgáfum í álbökkum, tilbúið beint á grillið. Undirbúningstíminn verður því lítill sem enginn og það er eitthvað sem viðskiptavinir okkar meta mjög mikils.“

Íslendingar elska tilbúnar sósur
Eitt af því sem hefur vakið athygli í sumar eru nýjar sósur frá Hrefnu Sætran sem nú eru komnar í úrval Hagkaups. Sigurður fer ekki í felur með ánægju sína með þá viðbót. „Hrefna er algjör snillingur og það er frábært fyrir okkur að fá sósurnar hennar í úrvalið. Ég er búinn að smakka þetta og þetta er mjög flott vara. Ég bjóst svo sem ekki við öðru frá henni, en það er alltaf gaman þegar væntingar standast.“

Sósur skipa sífellt stærri sess í grillmenningu landsmanna, að hans mati, og þar hefur Hagkaup markvisst byggt upp úrval. „Landinn elskar tilbúnar sósur og þar er úrvalið orðið alveg geggjað. Við merkjum okkar bestu sósur sem „sérvalið“, þar sem við göngum lengra í framleiðslunni og notum sérstaklega vandað hráefni. Parmesan-sósan okkar er til dæmis gerð með 24 mánaða ítölskum parmesan-osti og í gráðostasósunni notum við flottan franskan gráðost. Þetta skilar sér í bragðinu og gerir gæfumuninn. Ég mæli hiklaust með þessu.“

„Lambahryggurinn er kjötmikill og flottur“

Þegar hann er spurður hvaða kjöti hann mæli helst með á grillið, fyrir utan sígildu kótiletturnar, stendur ekki á svari. „Ef ég er ekki að grilla lambakótilettur finnst mér líka alveg geggjað að grilla lambahrygg. Ef það eru tveir til þrír í mat þá dugar hálfur hryggur mjög vel. Við seljum eingöngu lundarhlutann í Hagkaup og það þýðir að undir hryggnum ertu með tvær lambalundir, þannig að hryggurinn er virkilega kjötmikill og flottur.“

Að hans sögn þarf ekki flókna tækni til að fá góða niðurstöðu. „Ég sker bara í puruna, þurrkrydda vel og elda þetta svo í tunnugrilli eða við óbeinan hita í um það bil klukkutíma. Það kemur mjög vel út og er bæði einfalt og hátíðlegt í senn.“

Sigurður segist líka leggja áherslu á að grænmeti fylgi með grillmatnum, enda sé það bæði bragðgott og þægilegt á grillinu. „Já, við erum eiginlega alltaf með grillað grænmeti með. Mér finnst einfaldast að skera niður aspas, sveppi, papriku, rauðlauk og bara það sem þarf að klára úr grænmetisskúffunni. Svo set ég olíu og góð krydd yfir, velti þessu saman og grilla í grillgrind. Þetta er auðvelt, nýtir hráefnið vel og verður mjög gott.“

Er með pottjárnspönnu á grillinu
Hann nefnir sérstaklega eina tegund grænmetis sem hann hefur dálæti á. „Brokkolí er til dæmis algjör snilld á grillið. Ég marinera það í ólífuolíu og smá salti í um klukkutíma og svo fer það beint á grillgrindina. Það er einfalt en kemur rosalega vel út.“

Ekki eru þó allir jafn öruggir þegar kemur að því að grilla fisk og viðurkennir Sigurður að það geti verið snúnara en margan grunar. „Það er oft erfitt að grilla fisk beint á grillgrind. Fiskur er viðkvæmur og það er auðvelt að hann festist eða fari í sundur. Ég nota stundum pottjárnspönnu á grillinu og það virkar mjög vel, bæði fyrir nautasteik en líka fyrir fisk. Slík panna hentar vel til að grilla eða steikja allan fisk á grillinu án þess að maður þurfi að hafa áhyggjur af því að hann detti í sundur.“

Aðspurður hvort hann vilji deila uppáhalds grilluppskriftinni sinni þessa dagana fer hann strax í nautakjötið. „Þegar ég vil gera eitthvað virkilega gott þá er málið að kaupa sér gott ribeye, helst í Hagkaup,“ segir hann og hlær. „Ég leyfi steikinni alltaf að standa á borði í tvær til fjórar klukkustundir áður en ég elda hana og pensla hana með olíu. Sumir vilja krydda í lokin en ég krydda stundum áður. Svo set ég pottjárnspönnuna á grillið og hita upp í 250–300 gráður, set smá olíu á pönnuna og steiki kjötið í um fjórar mínútur á hvorri hlið. Eftir það færi ég steikina á efri hillu eða á svæði með minni hita í nokkrar mínútur. Að lokum læt ég hana standa í tíu mínútur áður en ég sker hana í sneiðar og ber hana fram. Þetta er einfalt og mjög gott.“

Black Angus-nautakjötið vekur athygli
Þótt grillsumarið sé stórt umræðuefni þessa dagana segir Sigurður að eitt af því sem hann sé hvað spenntastur fyrir sé þróun í íslensku nautakjöti. „Við erum miklir áhugamenn um gott nautakjöt og höfum á síðustu misserum sagt sögur af því þegar valdir gripir af Black Angus-kyni koma í verslanir. En það sem er ekki síður spennandi er það mikla starf sem íslenskir bændur hafa unnið á síðustu árum við að kynbæta íslenska nautið. Þetta nýja kyn er frábær bæting og hefur skilað sér í enn betra íslensku nautakjöti.“

Að hans mati er hér um að ræða raunveruleg gæðaskref. „Mér finnst þetta flottasta nautakjöt sem ég hef smakkað. Það er hins vegar ekki eitthvað sem verður til á einni nóttu. Það tekur tíma að byggja upp nýtt kyn á landinu og þess vegna er framboðið ekki stöðugt. Við fáum bara takmarkað magn nokkrum sinnum á ári og þess vegna verður þetta alltaf svolítið sérstakt þegar það kemur.“

Nú séu hins vegar spennandi vikur fram undan fyrir alla nautakjötsunnendur. „Góðu fréttirnar eru að næstu þrjár vikurnar erum við að fá nokkurt magn af slíkum gripum. Næstu tvær vikurnar verðum við með hefðbundnar steikur sem hafa fengið að meyrna í þrjár vikur og vikuna fyrir verslunarmannahelgi verðum við svo með hægmeyrnað ribeye sem er okkar flottasta kjöt. Það hefur þá meyrnað í fjórar vikur. Þetta eru því virkilega spennandi tímar fram undan fyrir alla sem hafa áhuga á góðu nautakjöti og ég hvet fólk til að missa ekki af þessu tækifæri.“

Gæði og einfaldleiki skipta miklu máli
Þegar allt er tekið saman er ljóst að nálgun Sigurðar og Hagkaups á sumarmat og grillmenningu byggist á tveimur meginstoðum: gæðum og einfaldleika. Annars vegar vill hann halda í íslenskar hefðir, gott lamb, vandað nautakjöt og ferskt grænmeti. Hins vegar vill hann mæta breyttum þörfum samtímans, þar sem fólk vill geta boðið upp á bragðgóðan mat án þess að fórna allri helginni í undirbúning.

Kannski er það einmitt kjarninn í því sem gerir sumarið svo aðlaðandi: að geta sameinað góða hrávöru, einfaldar lausnir og samveru við fjölskyldu og vini. Fyrir Sigurð virðist það felast í löngum íslenskum sumardögum, golfi eftir vinnu, ferð í Þórsmörk og vel grillaðri ribeye-steik þegar tilefni gefst. Og fyrir viðskiptavini Hagkaups snýst það um að geta gripið með sér marinerað kjöt, góða sósu, meðlæti tilbúið á grillið og notið kvöldsins án fyrirhafnar.

„Við viljum gera grillið einfaldara, betra og bragðmeira,“ segir Sigurður að lokum. „Fólk vill njóta sumarsins og ef við getum hjálpað því að setja saman góða máltíð með minni fyrirhöfn, þá erum við að gera eitthvað rétt.“