28. Febrúar 2026
Vel heppnað fermingarkvöld hjá Hagkaup og Beautyklúbbnum
Hagkaup hélt sitt árlega fermingarkvöld í vikunni í samstarfi við Beautyklúbbinn en þetta var í fjórða sinn sem viðburðurinn er haldinn. Kvöldið hefur á stuttum tíma fest sig í sessi sem skemmtilegur og fræðandi viðburður fyrir fermingarbörn og aðstandendur þeirra, þar sem allt sem tengist fermingarundirbúningi er tekið saman á einum stað.
Á kvöldinu fengu gestir að kynnast því fjölbreytta úrvali sem Hagkaup hefur upp á að bjóða fyrir ferminguna. Þar má nefna hina vinsælu veisluþjónustu Hagkaups, Veislurétti, sem einfalda undirbúninginn til muna, sem og fallegt og fjölbreytt skraut fyrir veisluna sem setur punktinn yfir i-ið á veisluborðið. Stemningin var létt og notaleg en jafnframt mjög fræðandi.
Hápunktur kvöldsins var án efa förðunar- og húðumhirðufræðsla með förðunarfræðingnum Lilju Gísladóttur, sem fór yfir helstu grunnatriði þegar kemur að húðumhirðu fyrir ungt fólk. Kvöldið var í boði Hagkaups og Beautyklúbbsins, sem saman leggja mikla áherslu á að miðla áreiðanlegum og gagnlegum upplýsingum. Lilja, sem starfar sem sérfræðingur markaðsmála hjá Hagkaup, hefur séð um fræðsluna á þessum kvöldum frá upphafi og segir þetta kvöld orðið stóran og mikilvægan lið í starfi Hagkaups ár hvert.
Hér er hægt að sjá vörurnar sem Lilja notaði
,,Við teljum það skyldu okkar að upplýsa þennan unga hóp um húðumhirðu og ýmislegt sem tengist snyrtivörum á þessum aldri þar sem þau eru að prófa sig áfram með nýjar vörur. Ég byrja fræðsluna alltaf á að taka það fram að húð hefur áferð og bólur eru fullkomlega eðlilegar og bæði áferð og bólur mega sjást. Það er vissulega hægt að hylja, en það er alls ekki nauðsynlegt, þetta snýst allt bara um að okkur sjálfum líði vel” segir Lilja.
Lilja lagði sérstaka áherslu á hversu mikilvægt það er að fræða ungt fólk um húðumhirðu og ekki síður hvað ber að varast. Í dag spila samfélagsmiðlar stórt hlutverk í því hvernig ungt fólk kynnist snyrtivörum og húðumhirðu, en þar getur myndast ákveðin upplýsingaóreiða sem erfitt er að rata í gegnum. Því skiptir máli að fá leiðsögn frá fagfólki sem setur heilsu húðarinnar í fyrsta sæti.
,,Fyrir unga húð snýst góð húðumhirða fyrst og fremst um gæði og einfaldleika fremur en magn og sterk virk efni. Of mikil notkun á virkum efnum getur í raun verið skaðleg fyrir viðkvæma, unga húð. Með réttum grunni og góðri fræðslu er hins vegar hægt að byggja upp heilbrigðar húðumhirðuvenjur og það er það sem við viljum koma á framfæri. Það sama gildir svo í rauninni um förðunina, þetta snýst ekki um að nota allt og alveg hylja húðina með mörgum mismunandi vörum heldur er oft gott að minna sig á að less is more, svo ég sletti örlítið” segir Lilja.
Á námskeiðinu fór Lilja létt yfir húðvörur sem henta vel fyrir unga húð ásamt því að vera með sýnikennslu á einfaldri, léttri og náttúrulegri fermingarförðun þar sem húðin og náttúruleg fegurð fær að njóta sín. Áherslan er lögð á að húð er allskonar og það er eðlilegt að hún sé ekki alltaf slétt og bólulaus. Það sé engin nauðsyn að farða sig en það skiptir mestu máli að gæta hreinlætis í öllu sem við kemur förðun og vanda vel valið á húðvörum.
Fermingarkvöld Hagkaups er því ekki aðeins skemmtilegur viðburður heldur líka mikilvægt tækifæri til að miðla ábyrgri fræðslu á sama tíma og fermingarundirbúningurinn fær að njóta sín. Við hlökkum svo sannarlega til að bjóða upp á svona námskeið í fyrsta skipti á Akureyri 5. mars en skráning hefst mánudaginn 2. mars.
